Skessuhorn:

Fannst þorramaturinn heldur súr - lögregla skakkaði leikinn

9. febrúar 2010

Ungt starfsfólk fyrirtækis á höfuðborgarsvæðinu sem fór í óvissuferð upp í Borgarfjörð á dögunum lét heldur ófriðlega að loknu borðhaldi á veitingastaðnum sem það endaði gleðskap sinn á. Unga fólkið hefur eflaust búist við pizzum, hamborgurum með frönskum eða öðrum hefðbundnum höfuðborgar- eða veitingahúsamat. Því fannst heldur súrt að kyngja þorramatnum sem einungis var í boði og eldra fólk í hópnum gerði sér að góðu og var mjög ánægt með.  Lögreglan í Borgarfirði og Dölum var kölluð á staðinn og tókst fljótlega að koma skikki á mannskapinn sem yfirgaf svæðið í rútu og hélt áleiðis suður á vit annarrar matarmenningar og hefða.